శంకర ప్రబోధ మంజరి: అద్వైత పంచరత్నమ్

.. అద్వైత పంచరత్నమ్ ..

నాహం దేహో నేన్ద్రియాణ్యన్తరంగో

నాహంకారః ప్రాణవర్గో న బుద్ధిః |

దారాపత్యక్షేత్రవిత్తాదిదూరః

సాక్షీ నిత్యః ప్రత్యగాత్మా శివోహమ్ || ౧ ||

రజ్జ్వజ్ఞానాద్భాతి రజ్జౌ యథాహిః

స్వాత్మాజ్ఞానాదాత్మనో జీవభావః |

ఆప్తోక్త్యాహిభ్రాన్తినాశో స రజ్జు

ర్జీవో నాహం దేశికోక్త్యా శివోహమ్ || ౨ ||

ఆభాతీదం విశ్వమాత్మన్యసత్యమ్

సత్యజ్ఞానానన్దరూపే విమోహాత్ |

నిద్రామోహాత్స్వప్నవత్తన్న సత్యమ్

శుద్ధః పూర్ణో నిత్య ఏకః శివోహమ్ || ౩ ||

నాహం జాతో న ప్రవృద్ధో న నష్టో

దేహస్యోక్తాః ప్రాకృతాః సర్వధర్మాః |

కర్తృత్వాదిశ్చిన్మయస్యాస్తి నాహం

కారస్యైవ హ్యాత్మనో మే శివోహమ్ || ౪ ||

మత్తో నాన్యత్కించిదత్రాస్తి విశ్వం

సత్యం బాహ్యం వస్తు మాయోపక్లృప్తమ్ |

ఆదర్శాన్తర్భాసమానస్య తుల్యం

మయ్యద్వైతే భాతి తస్మాచ్ఛివోహమ్ || ౫ ||

|| ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛంకరభగవతః కృతౌ అద్వైత పంచరత్నం సమ్పూర్ణమ్ ||

శంకర ప్రబోధ మంజరి